SIBURAN: Sepenyampau 98 penerima ari kelab, serakup, agensi perintah, gerempung ukai dikuasa perintah (NGO) sereta Komiti Pemansang enggau Pengelikun Genturung Pendiau (JKKK) ba Kunsil Nengeri (DUN) Tarat nerima agih belanja sepenyampau RM1.39 juta nengah Program Nyuaka Chek Projek Khas 2026 kena Hari Enam.

Pengawa nyuaka chek sepenyampau RM1,389,128 nya dipenyadika Menteri Pelajar, Inovasyen enggau Pemansang Pengelandik Sarawak ti nyadi Kaban Kunsil Nengeri (ADUN) Tarat, Dato Sri Roland Sagah Wee Inn di Palan Servis ADUN Tarat.

Ku iya agi, agih belanja nya laluh agih belanja ungkup taun 2026 ti diagih dikena nyukung bemacham projek enggau inisiatif pemansang komuniti.

Ku iya, pemansang di DUN Tarat terus ditegap nengah pengawa bejalaika mayuh projek infrastruktur enggau perengkaguna pemun dikena nambah pengelantang sereta tikas idup peranak.

Ba timpuh lima taun ti udah, bisi 166 projek beungkus RM25 juta udah dipejalai nengah Program Transfomasyen Menua Pesisir (RTP), kelimpah agih belanja RM5 juta dikena ngaduka perabung rumah peranak ti jai.

Ku iya, pemansang endur nya bulih pemaik ari agih belanja Agensi Pemansang Greater Kuching (GKCDA) ke alai projek beungkus manggai RM180 juta.

Entara projek besai iya nya ngaga jalai ari Semeru ke Kehum beungkus RM90 juta ti deka nambah penyambung kandang menua pesisir, kelebih agi ngemuntang pejalai peranak ari Tebedu ke Tapah enggau Bau.

Iya mega madahka perambu pejalai renggat kedua projek jalai alun ari Teng Bukap ke Annah Rais di Padawan ti dipelaba beungkus RM166 juta.

Nambah ke nya, iya ngarapka agensi pengatur nyengkaum Opis Kereja Raya (JKR) enggau Kaunsil Pelilih Serian ulih ngerumban pejalai projek ti udah dikemendar nentuka pemaik nya ulih diasai peranak enggau nadai napi penanggul laun.

Ku iya, Projek Mit Pemansang Menua Pesisir (MRP) mega beguna amat dikena nangkup peminta komuniti, kelebih agi nengah pejalai projek mit ti meri pemaik terus ngagai peranak.

Ngenang sukut pelajar, iya nyemetak madahka pengeransing Perintah Sarawak dikena ngerembai akses pelajar tinggi nengah Skim Pelajar Tinggi Pechuma Sarawak (FTES) kelebih agi ba bidang ti bisi peminta tinggi dalam industri enggau ekonomi baru.

Ku iya, kitai mega ngemerat bidang sains, teknologi, injiniring enggau matematik (STEM) sereta latih pengelandik teknikal beguna dikena nempa pengereja pengawa ti landik enggau tetangkupka peminta makit kereja.

Berebak enggau nya, iya meransang raban sekula sereta Serakup Apai Indai enggau Pengajar (PIBG) chakah ngatur program STEM dikena mantu nembiak ngelala pengulih diri sereta peluang kereja ba bidang teknologi tinggi.

Iya mega nyebut inisiatif Sarawak negap pengelebih pansik enggau inovasyen nengah Sarawak Infectious Disease Centre (SIDC), kelimpah pemansang pakar menua ba bidang teknologi, ngaga chip enggau industri teknologi tinggi.

Nya alai, iya ngelalau anak Sarawak ngerebut peluang pelajar enggau sekularship ti disedia dikena nyungkak pemansang nengeri dudi hari. - EDISI UKAS