Kepala Menteri Bekunsi Penemu Ke Engkeman Dikena AZAM Sarawak Ba Jeman Baru Tu

HARI DUA, 27 APRIL 2021

KUCHING: Kepala Menteri, Datuk Patinggi (Dr) Abang Abdul Rahman Zohari Tun Datuk Abang Openg nerima penemuai basa ari Angkatan Zaman Mansang (AZAM) Sarawak di Wisma Bapa Malaysia, Kuching, kena Hari Dua.

Chairman AZAM Sarawak, Datu William Patrick Nyigor maya dirandau media madah, tuju sida nemuai iya nya deka ngerintaika penemu senentang pekara bekaul enggau aktiviti sereta perambu dikena nyungkakka tanggungpengawa AZAM Sarawak ba jeman baru tu.

Ku iya, sida mega berandauka buah penemu enggau mendingka jaku lalau ari Kepala Menteri maya nya.

“Kepala Menteri Datuk Patinggi Abang Zohari udah ngajar lalu meri penemu ngagai AZAM Sarawak ngambika pengawa ke digaga kami engkeman agi ba jeman baru tu kelebih agi maya meri program randau sereta berandau enggau mensia mayuh di menua pesisir, Tuai Raban Bansa enggau Tuai Rumah (KMKK) nyengkaum raban nembiak ba ekonomi digital tu.

“Kelimpah ari nya, kami mega berandauka sentang pemaik ngintu rampa menua.

“Tu penemu baru diberi Kepala Menteri ngagai AZAM Sarawak,” ku iya nerang ngagai media. –EDISI UKAS

Share

add comment