ATM Patut Bisi Di Pasar Debak

HARI SATU, 6 SEPTEMBER 2021

SARIBAS: Servis kiosk ATM patut digagaka ba Pasar Debak ngambika bisi dikena lebih 15,000 iku peranak pelilih Debak.

Kaban Kunsil Nengeri (ADUN) Saribas, Mohammad Razi Sitam madah, kelimpah tubuh rayat dia majak mayuh, servis nya beguna nyerumba macham bengkah pemansang benung digaga ba pelilih nya.

Iya madah, sekeda ari pemansang ke benung digaga iya nya projek Jalai Suri ke Tuie.

Ku iya, penembu projek nya ti deka ngemuntangka penyauh pejalai ari 40 kilometer ngagai semilan kilometer deka nyungkakka penatai pemisi rayat lebih agi ba pekara dagang temuai.

Iya bejaku munyi nya ngagai UKAS maya dirandau udah ke ngabas palan ke diperambu alai ngaduka servis ATM di Bangunan Serbaguna Komuniti Debak enggau Dewan Perpaduan Debak, empai lama.

Nambahka jaku iya, Mohammad Razi mega madahka Projek Agorpark Saribas ke digaga ba pelilih nya bela deka ngerembaika agi pengawa ekonomi rayat dia.

Ketegal nya, iya ngarapka bank baka Agrobank ulih bejadika peminta rayat Debak nya.-EDISI UKAS

Share
0

add comment