HARI MINGGU, 6 FEBRUARI 2022
SARIBAS: Perintah Sarawak deka terus chakah nyaup peranak menua pesisir nentuka tanah sida dikena nyungkakka penatai pemisi.
Sapit Kepala Menteri Datuk Amar Douglas Uggah Embas madah, pekara nya sebagi ari pengawa perintah Gabungan Parti Sarawak (GPS) kelimpah nyungkakka bungkur internet ba menua pesisir.
“Pekara ti dikemeratka Perintah GPS diatu iya nya nyaup rayat menua pesisir nambahka penatai pemisi nengah chara ngemansangka tanah sida.
“Kelimpah ari nya, perintah mega deka nyungkakka bungkur internet sereta ngemanahka servis ke udah bisi,” ku iya nerang.
Iya bejaku munyi nya ba Program Meri Terima Kasih Parti Pesaka Bumiputera Bersatu (PBB) Pampang Bakong, Ubar enggau Rimbas Ili di Balai Mensia Mayuh Spaoh ketegal pengeransing sida mai pemujur ngagai GPS ba sitak kunsil Saribas, kena Hari Enam.
Nambahka nya, Datuk Amar Douglas Uggah madah, penatai pemisi rayat ari sektor betanam betupi deka bekenaka chara betanam betupi moden kelimpah ngembing peranak menua tu disaup opis enggau ejensi bekaul.
“Ba Betong, Perintah Sarawak udah ngemendar sereta numbuhka ‘agropark’ Bebuling enggau Lubok Tamang nengah agih belanja RM108 juta ungkup Projek Padang Bilun Bebuling.
“Agropark tu nyadi model betanam betupi dikena ngembing peranak menua tu ngena chara betanam betupi moden,” ku iya nerang.
Berebak enggau nya, iya ke mega Kaban Kunsil Nengeri (ADUN) Bukit Saban nyemetak madahka pemujur GPS maya ba Pengawa Bepilih Besai Nengeri empai lama tu tadi, kelai rayat andal dipegai Kepala Menteri Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
“Pemujur kitai maya ba pengawa bepilih tu tadi nyadika pengeransing ngagai pengari rayat meri servis ke manah agi ngagai rayat.
“Pengari rayat mega patut mendingka penemu ari rayat lebuh ngaga langgur pemansang lalu pekara tu beguna bendar dikena nyaup ngubah pengidup ti seranta,” ku iya nambah.
Program maya nya bela digulu Menteri Muda Pemansang Orang Indu, Nembiak Mit enggau Pengelantang Raban Bansa ke mega ADUN Saribas, Mohd Razi Sitam sereta Kaban Parlimen Betong Datuk Robert Lawson Chuat. -EDISI UKAS