HARI MINGGU, 6 MAC 2022
KANOWIT: Sitak Kunsil Nengeri (DUN) Ngemah deka terus ngasaika pemansang asil ari pengawa ngemujurka bemacham Projek Transformasyen Menua Pesisir (RTP).
Kaban Kunsil Nengeri (ADUN) Ngemah, Anyi Jana madah, bisi 35 bengkah projek RTP diperambu deka digaga ba sitak nya taun tu.
Kelimpah ari nya, ku iya, Sarawak Multimedia Authority (SMA) mega deka nirika 9 iti tiang telekomunikasyen baru dikena ngemanahka agi bungkur arus internet enggau arus telefon ba sitak DUN Ngemah.
Iya madah munyi nya sepengudah bejadika Bup Profil Skim Pengentap Baru (SPS) Nanga Tada, Kanowit, kena Hari Enam apin lama ke udah.
Nangkan ke nya, Sapit Menteri Pengerai II Malaysia ke mega Kaban Parlimen Kanowit, Datuk Aaron Ago Dagang madahka mayuh projek pemnansang benung diperambu enggau deka digaga ba sitak Kanowit.
Ku iya, isu pemansang ba Nanga Jagau, Nanga Ngungun enggau Nanga Tada mega benung diperati.
Nya alai iya meri pengaga ati ngagai raban AJK Besai Nanga Tada laban udah mujur nyelak Bup Profil SPS Nanga Tada.
Ba awak nya mega, iya meri tabi puji ngagai pemujur Anyi Jana maya PRN12 tu tadi sereta ngagai Susan Clement ke udah dichiri mangku pengawa nyadi Sekretari Politik Premier Sarawak. – EDISI UKAS