HARI EMPAT, 10 MARCH 2022
MIRI: Tiap iku raban penerit adat ba Opis Sungai-Sungai Sarawak (LSS) patut bisi penemu undang-undang enggau akta bekaul enggau sungai.
Menteri Perengka Pengangkut Sarawak, Dato Sri Lee Kim Shin madah, tu deka ngelempungka pengawa sida maya neritka adat sentang undang-undang sungai enggau rampa menua.
“Batang pekara ke patut dikembuan kita iya nya nemu nama bagi atur enggau undang-undang tanggungpengawa diri,” pia ku iya madah maya bejadika Program Penglibatan Undang-Undang begulai enggau Pegawai Penerit Adat LSS di Miri, kena Hari Tiga.
Kus nya diatur dikena nyungkakka penemu raban penerit adat bekaul enggau SRO 1993, atur sereta undang-undang ke bukai.
Kus tu mega digulu 50 iku raban penerit adat LSS ari serata Sarawak.
Bela datai maya pengawa tu iya nya Sapit Menteri Perengka Pengangkut II Sarawak Dato Henry Harry Jinep, Pemangku Kontroller SRB Lt Kolonel Ding Tiew Wong, Tuai Pengatur Koporat Rozita Kulai enggau Sapit Kontroller SRB Wilayah Utara Luhat Laing.-EDISI UKAS