HARI SATU, 21 MARCH 2022
SRI AMAN: Sekretari Perintah Nengeri Sarawak, Datuk Amar Jaul Samion udah datai ngulu Program Randau Pemansang Betanam Betupi ba Rumah Ramie Jaritan di Sebemban Selanjan, kena Hari Minggu tu tadi.
Maya nya iya diterang enggau program Perintah Sarawak ti deka ngemansangka pengawa betanam betupi nengah chara moden lalu nempa Sarawak nyadi menua eksport barang pemakai bepelasarka betanam betupi manggai taun 2030.
Ba jaku iya, Datuk Amar Jaul madah, Opis Betanam Betupi Sarawak udah ngepunka pakej ti ngena chara begempuru ba rayat ke bisi tanah 10 ekar pemesai.
“Kelimpah ari nya, Perintah Sarawak mega bisi numbuhka turu perengka guna betanam betupi (AFF) ngagai sida ke betanam betupi dikena nyaup nambahka penatai pemisi rayat,” ku iya madah.
Program sehari nya bela digulu Kaban Kunsil Nengeri (ADUN) Bukit Begunan, Datuk Mong Dang.
Nambahka jaku iya, Datuk Amar Jaul madahka Opis Menteri Betanam Betupi Moden enggau Pemansang Kandang Menua Sarawak enggau Opis Betanam Betupi Sarawak udah nentuka endur alai ngaga ‘Food Terminal’.
Ketegal nya, iya ngarapka mayuh agi rebak baru bela ngambi bagi sereta chakah ngereja sektor betanam betupi. -EDISI UKAS