HARI DUA, 29 MARCH 2022
SARIKEI: Taman Agro Sungai Baji Sarikei tau bendar dikemansangka nyadi siti hub pemansut pemakai di nengeri tu.
Menteri Betanam Betupi Moden enggau Pemansang Kandang Menua Sarawak, Dato Sri Dr. Stephen Rundi Utom madah, tu seririh enggau juluk ati deka nempa Sarawak nyadi nengeri pemansut pemakai ba taun 2030 kelimpah nyungkakka tikas penatai pemisi orang betanam betupi enggau chara moden.
“Projek Taman Agro 127 hektar pemesai tu tau bendar nyaup orang betanam betupi ari pengawa bekenaka teknologi baru sereta besaup enggau kompeni luar,” pia ku iya madah maya ngabas projek nya di Sarikei, kena Hari Satu.
Nambahka jaku iya, iya madah, pengawa betanam betupi moden nya mega dikeandal ulih matak raban nembiak ngereja pengawa nya kelimpah numbuhka kereja puang sereta mulaika penatai pemisi ke manah.
“Sekeda ari perengkaguna bisi digaga ditu baka ‘greenhouse’, inkubator enggau terminal nyual produk, palan latih, karan, ai enggau telekomunikasyen,” ku iya madah baru.
Dato Sri Dr. Stephen Rundi mega madahka palan nya bela tau digagaka nyadi palan latih betanam betupi moden kelimpah nyadi palan Agro Dagang Temuai.
Bela datai nyempulang iya maya nya, Sapit Menteri Pengatur Mengeri, Tanah enggau Rampa Menua, Datu Len Talif Salleh enggau Sapit Menteri Betanam Betupi Moden enggau Pemansang Kandang Menua (Pemansang Kandang Menua) Maclaine Ben @ Martin Ben. -EDISI UKAS