HARI TIGA, 30 MARCH 2022

NUSANTARA: Perintah Besai agi mansik kaul kompeni peribit ari Malaysia beranakka puku di Indonesia lebih agi ba pengawa ngemansangka menua Nusantara.

Pekara tu dipadahka Menteri ba Opis Menteri Besai (Pekara Sabah enggau Sarawak), Datuk Seri Panglima Dr Johnity@Maximus Ongkili maya dirandau udah nemuai bejalaika pengawa ngagai Titik Nol ba Taba Indu Menua Baru Indonesia di Nusantara, kena Hari Satu.

Ku iya, sida udah meda ‘master plan’ enggau ‘time frame’ Perintah Indonesia lalu deka berandauka enggau silik atur nangkan ke nya dikena nyaup pemeranak puku ari Malaysia di Indonesia.

“Pekara tu dipadahka agi tumu tang kami udah meda ‘master plan’ enggau ‘time frame’ Perintah Indonesia.

“Ari nya Perintah Malaysia deka nyaup pemeranak puku Malaysia lebih agi ngambi bagi ba pengawa beranakka puku enggau ekonomi di Indonesia,” ku iya madah.

Nambahka jaku iya, Datuk Seri Panglima Dr Johnity@Maximus nerang, kaul ekonomi Sarawak, Sabah enggau Kalimantan mesti ditegapka dulu taja kaul nya udah ditanggam sebedau tu.

Dulu ari nya, Sapit Premier Sarawak, Datuk Amar Awang Tengah Ali Hasan madahka kaul Malaysia lebih agi Sarawak enggau Sabah enggau Kalimantan Indonesia mesti disungkakka agi.

Iya madah, mayuh awak ulih ditempa udah tu lalu kompeni peribit mesti ngambi bagi ba pengawa nyungkakka kaul Malaysia enggau Indonesia.

“Kami mega udah berandau enggau raban peribit ba pekara bekaul ba pengawa ngemansangka ekonomi,”pia ku iya.

Datuk Amar Awang Tengah madah baru, iya ngarap jalai alun di Selatan enggau Utara Kalimantan ulih digaga lalu dikemanahka ngagai Sarawak enggau Sabah kelimpah ngaga mayuh agi Kompleks Kastam, Imigresen enggau Kuarantin (CIQ) ba entara menua. -EDISI UKAS

add comment