HARI TIGA, 20 APRIL 2022

SARIKEI: Perintah diatu benung ngemeranka pengawa berundingka chara ke ulih dikena ngatur projek pemansang tanah.

Menteri ba Opis Premier Sarawak, Datuk John Sikie Tayai madah, pengeransing tu bepun ari deka nyaup rayat bulih penatai ti meruan agi.

“Batang pekara ke benung dikemeranka perintah diatu iya nya ngiga chara ke ulih dikena ngaduka projek ngemansangka tanah ngambika ulih numbuhka pun penatai pemisi ngagai rayat,” pia ku iya maya Program Rayat Begulai enggau Pemesai ba Rumah Tayan Gundi di Sarikei, empai lama tu tadi.

Dulu ari nya, Kaban Kunsil Nengeri (ADUN) Repok, Dato’ Sri Huang Tiong Sii ba jaku iya madah, menua Sarikei diatu benung ngasaika pemansang bepun ari pemujur pegai Perintah Gabungan Parti Sarawak (GPS) ti betuaika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

“Mayuh projek besai udah dikemendarka digaga ungkup menua Sarikei.

“Tu nyengkaum baka projek Jalai Pasi ke Tanjung Manis, Agro Park enggau Palan Ngumpul, Ngadu enggau Nungkus Produk Betanam Betupi (CCPC) ti tau bendar ngemansangka agi menua Sarakei kelimpah nyungkakka tikas pengidup rayat,” ku iya madah.

Ba program nya, Datuk John Sikie bisi ngungkupka agih Projek Mit Menua Pesisir (MRP) RM20,000 ngagai Komiti Pemansang enggau Pengelikun Genturung Pendiau (JKKK) Rumah Tayan.-EDISI UKAS

add comment