HARI EMPAT, 19 MEI 2022
KUCHING : Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyukung penemu deka ngatur konvensyen media taun tu ti ngembuan tuju nyungkakka tikas pemanah adat chara ba pengarang berita.
Iya madah, enti pengarang berita mekuhka adat chara bejalaika pengawa mai ubah runding enggau penemu rayat, ulah nya patut bisi tikas pemanah kediri empu.
“Kitai ulih ngubah sesebengkah adat chara laban pekara tu mesti bisi ba pengawa nyadi pengarang berita.
“Ambika banding ba pengawa ekonomi, nyangka bisi raban ke landik ba ekonomi laban kitai mega begunaka timbal ari pekara bekaul ekonomi.
“Lalu enti ba pekara rama enggau chara pengidup mensia mayuh, giga pengarang berita ti ngembuan chukup pengelandik ba pekara nya,” pia ku iya maya Pengerami Ramah Tamah Raban Media ke diatur Unit Komunikasyen enggau Pemadah Sarawak (UKAS) di Kuching, kena lemai Hari Tiga.
Ba pengerami nya, Premier Sarawak bela meri jaku terima kasih ngagai raban media enggau ejensi perintah ti udah mandangka pengeransing besaup napi pengelekai pandemik COVID-19 ba nengeri tu.
Dulu ari nya, Sapit Menteri Pekara Korporat enggau UKAS, Datuk Abdullah Saidol ba jaku pengelalu iya madahka raban media ulih nyadi pelasar sereta bejalaika pengawa nyadi ‘jematan’ entara perintah enggau rayat.
Ku iya, tu diumbaka media tau bendar nyadi ejen ti ulih nyaup nyempilka agi seraka penemu enggau runding rayat enggau perintah sereta ejensi perintah ke bukai.
“Ari sukung Premier Sarawak, kitai merambu deka ngatur sebengkah Konvensyen Media baikka digaga betikas sedang tauka entarabansa di Sarawak.
“Kitai deka mai raban media enda ngira ari ni, besaup begempung penemu nempa langkar atur baru enggau gaya ke dipekuh media ti tau nyadi siti ari komponen ke besai reti ba struktur ekonomi digital betikas besai,” pia ku iya.
Pengerami lemai nya bela digulu Sapit Premier Sarawak, Datuk Amar Douglas Uggah Embas enggau Datuk Sri Dr. Sim Kui Hian sereta temuai dipebasa ke bukai. -EDISI UKAS