HARI LIMA, 10 JUN 2022
KUCHING: Republik Korea nyadi menua ketiga pemadu mayuh nangkan Jepun enggau China ngimport Gas Asli Cecair (LNG) ari Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ba taun 2020, Sarawak udah eksport 4.9 juta tan LNG ke berega RM5.9 bilion ngagai menua nya.
Ku iya, Sarawak enggau Republik Korea endang udah bisi kaul ke manah kenyau ari taun 1970-an suba.
“Kaul nya diatu nyadi besai agi reti nyerumba pemansang sektor ke nyadi beberapa taun tu.
“Ambika banding kitai udah meri kontrak 1.07 bilion Dolar Amerika Syarikat ngagai Samsung Engineering Co. Ltd. ngaga servis lisin, ‘engineering’ enggau ngaga sereta nyiri (LEPCC) ba projek metanol Sarawak di Tanjung Kidurong Bintulu,” ku iya maya Forum Dagang Kuasa Sarawak-Korea 2022 di kuching, kena Hari Empat.
Ba pekara bukai, Premier Sarawak madahka nengeri tu bela nyikap diri nyadi kuasa besai ba Asia Tenggara ari pengawa nyendiaka kuasa ulih diempu, ulih dikeandal sereta ulih dikena baru.
“Sarawak deka ngetanka abis nadai 60 peratus penyampau pemansut kuasa macham bengkah nengah penatai pun kuasa ulih dikena baru manggai taun 2030,” ku iya madah baru.
Iya andal, ulah ngemeranka pengawa nguna pun penatai kuasa betandu besai reti ngagai pemansang ekonomi enggau rama. -EDISI UKAS