HARI DUA, 13 DISEMBER 2022
KUCHING: Mambong deka nyadi menua ‘Bakul Pemakai’ ungkup sitak Kuching.
Sapit Menteri Perengka Pengangkut Sarawak, Datuk Dr. Jerip Susil madah, Perintah Sarawak endang meras deka nyungkakka pengawa betanam betupi ke pengelantang rayat mayuh.
“Mambong tu semak enggau Kuching alai ulih nyadi ‘bakul pemakai’ ngagai Sitak Kuching.
“Ukai semina nya, Mmambong enggau Siburan endang nyadi menua pemansut pemakai ungkup Kuching laban tebal agi sayur enggau dagin datai ari Siburan,” ku iya madah maya Pengerami Bejadika Mini Lab Mambong ke diatur Greater Kuching Coordinated Development Agency (GKCDA) ditu, Hari Dua.
Datuk Dr. Jerip ke mega Kaban Kunsil Nengeri (ADUN) Mambong madah, sekeda ari utai tanam ke udah ditentuka ditanam di Mambong iya nya kopi Liberica.
“Kopi Liberica tu mayuh di tanam di Sarawak lalu kitai deka ngemansangka menua Mambong nyadi palan ngaduka kopi tu,” pia ku iya madah baru.
Ba pekara bukai, Datuk Dr. Jerip mantaika penemu diri madahka kerita kabel tau digaga ba Kampung Sapit, Kampung Kiding enggau Kampung Simuti di tanah tinggi ngelawa Puncak Borneo.
“Chara tu dipeda engkeman laban kitai enda ibuh ngaga jalai alun lalu tu mega deka ngetanka pengelebih ba pekara dagang temuai di tanah tinggi,” ku iya madah.
Bela datai maya nya Kaban Parlimen Puncak Borneo, Datuk Willie Mongin enggau Pegawai Tadbir Khas GKCDA, Datu Ik Pahon Joyik sereta kebukai. -EDISI UKAS
