HARI SATU, 13 FEBRUARI 2023
SIBU: Bike Fest Sibu 2023 mujur matak 2,000 iku sida ti bisi mutosikal 250 cc ke baruh ari lebih 60 buah gerempung mutosikal ari Sarawak, Sabah, Brunei enggau Kalimantan, Indonesia ke diatur ba Taman Selera Harmoni Sibu.
Palan pengerami nya ditentuka Opis Kaunsil Sibu (SMC) enggau PDRM lalu disaup Gerempung Orang Dagang Islam Taman Selera Harmoni ke diatur begulai enggau Roadshow Borneo.
Pengerami nya udah dipenyadika Kaban Kunsil Nengeri (ADUN) Bukit Assek, Joseph Chieng Jin Ek, Hari Minggu tu tadi.
Maya berandau enggau media, Joseph Chieng madahka Bike Fest Sibu dipeda tau bendar nyaup nyungkakka agi ekonomi rayat Sibu.
“Aku meda program tu manah bendar diatur lalu tau diangkatka agi dudi hari ila nengah sukung ari Opis Menteri Raban Nembiak enggau Lumba sereta Opis Menteri Dagang Temuai.
“Kitai ulih meda program tu matak penyereta ari menua bukai,” ku iya madah.
Iya mega madah, pengerami nya bela matak temuai ari menua bukai ti nambahka penyampau temuai datai ke Sibu.
“Nya alai aku andal amat deka meda pengerami tu nyadi siti agi ‘kelai’ ngagai Sibu tauka Sarawak baka program bukai iya nya Sibu Tower Run, Sibu International Base Jump enggau Kuching Marathon,” ku iya madah baru.-EDISI UKAS