HARI DUA, 14 MARCH 2023
KOTA SAMARAHAN: Perintah Sarawak semampai berunding ngiga chara dikena nyungkak pemansang di menua pesisir.
Sapit Premier Sarawak Datuk Amar Awang Tengah Ali Hasan madah, pengeransing tu ulih dipeda ari pengawa meri pampas ngagai menua ke bisi ditujah projek.
“Pengeransing perintah tu ulih dipeda kitai ari macham bengkah pemansang infrastruktur ke udah dikemendar lalu bisi mega benung digaga.
“Ambi ke banding baka pengawa ngaduka jalai nebing sungai, Jalai Besai Kedua (Second Trunk Road), projek jalai baru, ngaduka jalai ke endang udah bisi, ngaga jematan, tiang telekomunikesyen, karan, ai, Skim Genturung Pendiau Baru (SPS), Skim Nangkir Genturung Pendiau (SPK) enggau mayuh agi.
“Semua tanah ke bisi ditujah projek tu endang dibayar pampas nitihka penyampau ke dipadah Opis Tanah enggau Servei Sarawak,” ku iya madah.
Iya bejaku munyi nya maya Pengawa Nyuaka Chek Pampas Projek ba Sitak Samarahan ke diatur ba Dewan Suarah Kota Samarahan, Hari Satu tu tadi.
Nambahka jaku iya, Datuk Amar Awang Tengah mega madah, dikena ngaga pemansang nya, perintah nadai chara bukai kelimpah ngena tanah rayat.
“Baikka tanah nya tanah bisi orang ngempu, tauka NCR, perintah endang deka mayar pampas nitih Kanun Tanah Negeri Bab 81 enggau Pekara 13 Konstitusyen Besai,” ku iya madah baru.
Ba pengawa nya, Datuk Amar Awang Tengah dipebasa nyuaka 120 chek pampas ngagai 11 penerima ari Kampung Tegelam, Kampung Sungai Alit, Kampung Sungai Tanju/Kampung Beliong, Kampung Lubok Kura enggau Kampung Reban enggau semua penyampau RM20,070,902.34.
Pengawa sehari nya bela digulu Sapit Speaker Kunsil Nengeri (DUN) Sarawak ke mega ADUN Muara Tuang, Dato Idris Buang sereta pemesai ke bukai.-EDISI UKAS