HARI SATU, 20 MARCH 2023
KUCHING: Bisi 710 iku orang kereja perintah ari 35 opis enggau ejensi nyengkaum 29 ari Perintah Sarawak enggau enam ari Perintah Besai nerima Anugerah Pingat Perkhidmatan Setia sitak kuching.
Pengawa nya dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kuching, Sehari Tu Tadi dikena masa orang kereja Perintah Sarawak enggau Perintah Besai ke udah gawa nyaup pemansang nengeri tu.
Dulu agi nerima midul basa maya nya, Luyar Besai Nengeri Sarawak Dato Sri Talat Mahmood Abdul Rashid enggau Sekretari Wang Nengeri Sarawak Dato Sri Dr Wan Lizozman Wan Omar.
Datuk Patinggi Tan Sri Abang Zohari ba teks jaku iya madah, pengereja pengawa perintah megai pengawa ke besai nentuka kuing pemujur pelin, tuju enggau pengawa ke udah dilanggur Perintah Sarawak.
“Ba pengawa ngemujurka Pelin Pemansang Udah Covid-19 (PCDS) 2030, orang kereja perintah patut nyikap diri enggau penemu ke patut ngambi ulih tetipakka ubah ke deka nyadi sereta nentuka pengawa diri dikemujurka enggau manah,” ku iya madah.
Maya nya mega iya bisi nyebut bekaul enggau pengawa ngereja penyalah ti dibantaika ba media rama tau bendar ngeruga pemanah imej orang kereja perintah.
“Tiap iku orang kereja perintah meseti ngemeran ulah manah enggau integriti maya bejalaika pengawa diri.
“Tu beguna ngambika rayat semampai andal orang kereja perintah ulih meri servis ke pemadu manah,” pia ku iya madah baru.
Bela datai maya nya, Sapit Premier Sarawak, Dato Sri Prof Dr Sim Kui Hian, Speaker Kunsil Nengeri (Dun) Sarawak, Tan Sri Datuk Amar Mohamad Asfia Awang Nassar, Sekretari Perintah Sarawak Datuk Amar Mohamad Abu Bakar Marzuki enggau bala pemesai ke bukai.-EDISI UKAS