HARI TIGA, 22 MARCH 2023
KUCHING: Perintah Sarawak melabaka tiga juta iku temuai deka napatka menua tu alai nemuai ti ulih mulaika asil RM7.25 bilion ba resit dagang temuai ungkup taun tu.
Menteri Dagang Temuai, Industri Kfreatif enggau Seni Pemerindang, Dato Sri Abdul Karim Rahman Hamzah madah, penyampau temuai ari menua bukai datai ke Sarawak dipeda nambah ari 235,245 ba taun 2021 ngagai 2,027,446 taun siti tadi.
“Ari bulan Januari ngagai Februari tu tadi, penatai temuai bisi nambah 320.2 peratus ngagai 600,037 temuai enti dibanding enggau timpuh ke sebaka ba taun 2022 suba,” pia ku iya madah.
Iya bejaku munyi nya maya aum media Aum Komiti Malin Temuai Nengeri Sarawak ditu, Hari Dua tu tadi.
Kelimpah ari nya, Dato Sri Abdul Karim mega madah, perengkaguna ba Taman Negara di Sarawak ti nyadi pematak temuai datai ke nengeri tu patut dikemanahka agi.
Ba pekara bekaul, iya madah, Borneo Highlands Resort diatu udah diempu Perintah Sarawak.
“Pengawa ngaduka baru endur tu nyangka begunaka timpuh ti lama laban udah lama enda dibuka.
“Kabinet Sarawak udah ngungkupka belanja ngagai Opis Kaunsil Padawan (MPP) dikena ngaduka pengawa ti patut,” ku iya madah baru.
Bela datai maya nya Sapit Menteri Dagang Temuai, Industri Kreatif enggau Seni Pemerindang Sarawak (Pekara Dagang Temuai), Datuk Sebastian Ting Chiew Yew, Sapit Menteri Dagang Temuai, Industri Kreatif enggau Seni Pemerindang Sarawak (Pekara Industri Kreatif enggau Seni Pemerindang) Datuk Snowdan Lawan enggau Chairman Opis Dagang Temuai Sarawak (STB) Dennis Ngau. -EDISI UKAS