HARI ENAM, 10 FEBRUARI 2024
KUCHING: Pengerami Nerima Pengabang Taun Baru China 2024 ke diatur Perintah Sarawak mandangka penyerakup enggau pengelebih pupu raban bansa di nengeri tu.
Pengerami maya nya digulu lebih 5,000 iku temuai datai ba Palan Konvensyen Borneo Kuching (BCCK) kena Hari Enam ukai semina mungkur peranak bansa China aja, tang mega bansa ke bukai.
Ba program ke sebaka, bala temuai dipebasa ari perintah Sarawak bisi datai kelimpah meri jaku Selamat Ngintu Taun Baru China 2024 ngagai rayat ke bisi datai maya nya.
Pia mega, Tuai Megai Menua Yang Di-Pertua Negeri Sarawak, Tun Dr Wan Junaidi Tuanku Jaafar maya dirandau media bisi datai ba program nya seraya ngenataika jaku meri Selamat Ngintu Taun Baru China ngagai sida ke ngintu.
“Aku ngelalu semua rayat Sarawak enda ngira bansa tauka jalai pengarap sama ngerami pengerami tu Gong Xi Fa Cai,” ku iya.
Berebak enggau nya, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngelalau mensia mayuh ambika peranak menua tu terus beserakup dikena nyapai juluk perintah Sarawak.
Ku iya, ulah beserakup tu patut ditanka dikena ngemansangka nengeri tu tebal agi ba menua pesisir.
“Ba taun naga tu, kitai arapka jauh lebih mujur, ekonomi kitai majak ngerembai lalu rayat kitai semampai beserakup,” pia ku iya.
Ba program ke sebaka, Sapit Premier Sarawak Datuk Amar Profesor Dr Sim Kui Hian madahka diri berasai gaga lebuh meda pengerichah pengerami nya ti nerima timbal ke manah ari mayuh pupu bansa.
“Aku ngelalau semua rayat ba Sarawak semampai nyukung perintah ba baruh pegai Premier Sarawak dikena ngemansangka nengeri tu ba tikas ke manah agi,” ku iya madah.
Pia mega, Menteri Industri Pemakai, Komoditi enggau Pemansang Kandang Menua Sarawak Dato Sri Stephen Rundi Utom madah, pengerami tu mega ulih nyadika chunto ngagai orang bukai bekaul enggau penyerakup ti ditempa di nengeri tu.
“Kitai deka nyadi chunto rayat ke manah tajapan idup sama begulai enggau mayuh pupu raban bansa ba nengeri tu, kitai sama bela ngintu pengerami bansa bukai,” pia ku iya nerang.
Sama datai, Sapit Menteri Besai Dato Sri Fadillah Yusof, Sapit Premier Sarawak Datuk Amar Awang Tengah Ali Hasan enggau Datuk Amar Douglas Uggah Embas, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah sereta temuai dipebasa ke bukai. -EDISI UKAS