HARI ENAM, 10 FEBRUARI 2024
KUCHING: Pengerami Taun Baru China ti diintu raban bansa China tiap taun dipelabaka deka nyadi program ninting taun ba nengeri tu.
Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, tu nyadika program nya deka dipasukka ba kalendar Sarawak baka Hari Raya Aidilfitri enggau Gawai Dayak.
“Aku endang sigi nyukung laban mayuh pemaik ulih dipeda enti pengerami tu dipasukka ba kalendar.
“Sebedau tu, pengerami nya mina diintu ba renggat parti enggau gerempung, tang tu keterubah iya diatur perintah Sarawak, lalu ulih mega diintu ninting taun baka Hari Raya, Gawai enggau ke bukai,” ku iya nerang.
Iya madah munyi nya maya dirandau media sepengudah datai ba program Pengerami Nerima Pengabang Taun Baru China 2024 ke diatur ba Palan Konvensyen Borneo Kuching (BCCK), Hari Enam.
Pengerami maya nya dirichahka agi enggau penatai Tuai Megai Menua (TYT) Yang Di-Pertua Negeri Sarawak, Tun Dr Wan Junaidi Tuanku Jaafar enggau bini Toh Puan Fauziah Mohd Sanusi sereta Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bini Datuk Amar Juma’ani Tun Tuanku Bujang. – EDISI UKAS