AirBorneo Ngentap Penuduk Strategik Penyambung Sarawak
KUCHING: Pengawa ngelanchar rasmi AirBorneo kelai siti da pemujur besai ba pejalai industri penerebai Sarawak, lalu ngentapka penuduk strategi timpuh panjai nengeri tu nambahka jalai penyambung langit enggau nyukung pemansang ekonomi ngerenchah mengeri enggau menua pesisir.
Menteri Pengangkut Sarawak Dato Sri Lee Kim Shin madah, pemujur ngambi MASwings kena 1 Januari 2026 sereta ngelanchar penerebai terubah AirBorneo mandangka asil perambu silik enggau pengeran semua raban.
Iya meri terima kasih ngagai semua raban ti ngaul diri ba pengawa ngambi nya, sereta madah ke besikap intensif, aum penyeraris ti suah diatur sereta kerejasama rat entara agensi udah nentuka pengawa ngambi operasyen lanchar enggau nitih taga.
Ku iya, AirBorneo ditumbuh ukai semina betukar korporat aja, tang nyadi pengawa strategik ngentapka ekosistem penerebai Sarawak, kelebih agi ungkup siti nengeri ti ngembuan geografi sedandang enggau bepanggai ba rentayan langit.
Dato Sri Lee madah, pemutus Perintah Sarawak numbuhka AirBorneo mandangka chara bepuguka pemansang, mandangka sektor penerebai ulih meri asil belipat nengah pengawa puang, dagang temuai tumbuh enggau aktiviti ekonomi berega.
Nengah AirBorneo, ku iya, Perintah Sarawak diatu ngembuan enggau ngatur rentayan penerebai MASwings ke suba, ti terus nyendiaka servis langit menua pesisir di Sarawak, Sabah enggau Labuan.
“AirBorneo bebida ari kompeni penerebai bukai. Kami bejalai ngena dua pekara, iya nya servis langit menua pesisir di baruh sempekat obligasi servis mensia mayuh enggau segmen penerebai komersial. Semua pekara tu deka ditungkap chara profesional nentuka pemeruan timpuh panjai,” ku iya.
Sekumbang timpuh bekalih, iya meri jamin operasyen deka ditampung baka selama, enggau pengelikun, ulih dikeandal enggau nampung servis tetap diberi perati, kelimpah ngetan pemanah entara disiplin komersial enggau mandat servis perintah.
Iya mega madah, AirBorneo deka ngerembai berenggat ngagai penerebai serantau dipilih bepelasarka bilun ti bisi, peminta makit, pemeruan pejalai enggau sempekat servis langit begulai ti berengkah diterit, nentuka pengawa tumbuh meruan enggau nemban.
Sama datai Sapit Menteri Pengangkut Datuk Dr Jerip Susil, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sekretari Pekara Wang Sarawak Dato Sri Dr Wan Lizozman Wan Omar, Luyar Besai Sarawak Dato Sri Saferi Ali, Sapit Sekretari Perintah Sarawak (Perambu enggau Pemansang Ekonomi) Dato Sri Dr Muhammad Abdullah Zaidel, Sekretari Mendam Opis Menteri Pengangkut Sarawak Datu Wong Hee Sieng; sereta bala temuai dipebasa bukai.-EDISI UKAS
