KUCHING: Sarawak diatu majak dikelala ba renggat antarabansa lalu nyadi chunto nengeri bukai di menua tu bepun ari penegap politik enggau polisi pemansang ke nyengala.
Sapit Premier Sarawak, Datuk Amar Awang Tengah Ali Hasan madah, nengeri tu meruan mandang penyulut ukai semina ba tikas nasional aja tang datai ba renggat global nyengkaum matak perati Kesatuan Eropah enggau Amerika Syarikat.
"Ketegal nya, mayuh datai ke Sarawak baka bala duta ari Kesatuan Eropah semua datai ke Sarawak nyengkaum ari Amerika Syarikat.
"Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg suah dikangau bekunsika penemu bekaul ekonomi baru lebih agi bekaul hidrogen.
"Nya alai, kena pengelebih tu lalu kitai andal ulih nyingkang jauh ke mua agi dikena nyungkak pemansang nengeri Sarawak," ku iya madah.
Iya bejaku munyi nya maya Pengerami Ramah Tamah Aidilfitri Opis Menteri Dagang Antarabansa, Industri enggau Pemeranak Puku Sarawak (MINTRED) 2026 ditu, Hari Tiga.
Iya mega madah, Sarawak ngembuan langkar kereja undang-undang dikena nentuka pengelikun semua pengawa meranakka puku baikka pemeranak puku menua bukai (FDI) tauka domestik (DDI).
Ketegal nya, iya minta semua staf nyengkaum agensi ba baruh MINTRED ulih besaup nyadi siti tim sereta ngubah chara gawa ti lebih agi kreatif.
"Ari nya kitai ulih bejalaika strategi ke engkeman maya ngaduka pengawa.
Sama bela datai maya nya, Speaker Kunsil Nengeri Sarawak Tan Sri Datuk Amar Mohamad Asfia Awang Nassar, Sapit Menteri MINTRED Datuk Malcom Mussen Lamoh, Sapit Menteri Raban Nembiak, Lumba enggau Pemansang Orang Dagang Sarawak Datuk Dr Ripin Lamat, Penyanding Penemu MINTRED Dato Sri Mohd Naroden Majais, Sekretari Mendam MINTRED Datu Lester Matthew enggau Sekretari Mendam Opis Menteri Pengeraja Asal enggau Pemansang Mengeri Sarawak Datu Abdullah Julaihi. -EDISI UKAS
