Orang Gawa Perintah Ngetan Pengandal Rayat Napi Krisis Global
KUCHING: Ba gaya dunya majak enda tegap, orang gawa perintah diperansang nyadi tiang sukung nyaga pengandal rayat, ngena penyerakup nyadi pengering ba tetiap servis dipejalai.
Datuk Bandar Kuching Selatan, Dato Wee Hong Seng nyemetak madah, penyerakup ukai semina slogan aja, tang siti pekara ditegi ti patut dibantai ba ulah, kelebih agi maya rayat ditating belanja idup niki enggau pemar global ti majak mayuh leman.
Ku iya, pekara dikemerat diatu ukai semina ngintu hari besai aja, tang nentuka pengandal rayat ngagai institusyen sereta servis perintah ti entap.
“Tu ukai perang senyata, tang ngetan sukung rayat enggau pengandal sida,” ku iya lebuh bejaku ba Pengerami Gong Xi Raya Kaunsil Mengeri Kuching Selatan (MBKS) kena Hari Empat.
Pengerami nya mega digulu Sapit Datuk Bandar MBKS, Dato’ Dr Zaiedi Suhaili, Sekretari Bandaraya Pemangku MBKS Wong Ming Kong, raban gawa MBKS sereta pengabang bukai.
Iya madah baru, konsep Gong Xi Raya ti ngempung Taun Baru China enggau Hari Raya Aidilfitri mai pesan ti nyata ke alai penyerakup di Kuching ukai semina lambang aja, tang pun prinsip ti patut ditan.
“Ba dunya ti suah enda sepenemu, kitai milih majak begempung,” ku iya.
Iya mega nangkan, ekonomi global enggau penyarut antarabansa meri empas terus ba pengelantang rayat, lalu nya begunaka penyikar, pengepuh enggau penyiru orang gawa perintah.
Ari nya, Dato Wee madah ke tetiap pengawa enggau pemutus, taja mit, bisi empas besai ngasuh rayat andal sereta negapka kaul entara perintah enggau rayat.
