KUCHING: Sinergi entara agensi majak disungkak alai Unit Komunikasi Awam Sarawak (UKAS) udah ngatur penemuai basa ngagai Opis Menteri Pengerai Mensia Mayuh, Pengawa Berumah enggau Perintah Menua (MPHLG) dikena nentu pengulih ngenatai polisi enggau inisiatif perintah ngagai rayat.

Penemuai basa UKAS ngagai Sekretari Mendam MPHLG ti diarika Sapit Sekretari Mendam, Desmond Douglas Jerukan nya betuaika Direktor UKAS, Awang Putrayusrie Awang Redzuan, Hari Tiga.

Awak nya dikena berandauka pekara bekaul kerejasama strategik lebih agi dikena nyungkakka pengulih ngenataika penerang, polisi enggau inisiatif perintah ngagai rayat Sarawak.

Kelimpah ari nya, randau bela bekaul isu rama baka penanggul papan iklan (billboard) ba beberapa bengkah endur sereta langgur dikena mutarka penanggul nya.

Chara tu dipeda lebih agi proaktif dikena nentuka isu bekaul komunikasiyen enggau infrastruktur ulih diputar enggau berurun agi ti besai reti ba pemujur ngenatai servis perintah.

Penemuai basa nya bela disempulang bala pegawai opis menteri nya.-EDISI UKAS