SKAS, Diskaun Bil Karan & Suwa Premis Nyaup Rayat Napi Ungkus Belanja Idup
KUCHING: Perintah Sarawak pegai Gabungan Parti Sarawak (GPS) nengkebang beberapa bansa bantu dikena nyaup rayat napi ungkus belanja idup bepun ari konflik di Timur Tengah.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu nyengkaum nambah penyampau Bantu Barang Diguna Sarawak (SKAS), diskaun bil karan enggau diskaun suwa kedai Opis Bekuasa Menua.
Iya madah, penyampau SKAS ungkup taun 2026 ditambah ari RM950 nyadi RM1,100 ungkup ruang bilik, RM500 nyadi RM600 (orang tuai) enggau RM300 nyadi RM375 (orang bujang).
"Dipelaba nyauka 900,000 deka nerima bantu tu enti nitih rikod penerima Sumbangan Tunai Rahmah (STR) Taun 2026.
"Bantu deka diberi enggau chara berenggat iya nya tiga kali sepemanjai taun 2026.
"Keterubah udah diberi Mac tu tadi lalu ditangkan renggat kedua kena bulan Mei enggau ketiga November 2026.
“Penyampau ke ditambah tu deka bekenaka belanja sepenyampau RM136.2 juta,” ku iya.
Iya nerangka pekara nya ba aum media sepengudah bejadika Aum Kaunsil Perintah Nengeri (MMKN) begulai enggau raban Kabinet Perintah Sarawak di Kompleks Satria Pertiwi, ditu, Hari Empat.
Nambah ke jaku iya, Datuk Patinggi Abang Zohari madah, semua penyampau bantu 2026 Perintah Sarawak dikena ngatur SKAS taun tu manggai RM680 juta ari penyampau keterubah RM543.8 juta.
Iya ke mega Menteri Wang enggau Ekonomi Baru Sarawak madah, Perintah nengeri mega bisi meri diskaun 25 peratus bil karan domestik berengkah April nyentuk 2026 ti disadang deka mai pemaik ngagai lebih 700,000 pengguna di selampur nengeri.
Dikena orang dagang mit, diskaun 50 peratus bela diungkup dikena suwa pasar enggau kedai enggi Opis Bekuasa Menua sereta premis dagang pegai Badan Berkanun nengeri ti dipelaba ngena belanja manggai RM8.1 juta.
Bela datai ba aum media iya nya Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Kui Hian sereta Sekretari Perintah Sarawak Datuk Amar Mohamad Abu Bakar Marzuki.-EDISI UKAS
