KUCHING: Peranak Lawas ti belelang gawa di menua orang diperansang ngena manah penemu, peneleba enggau rentayan kaul sida besaup gawa ke pemansang rayat ba menua asal diri.

Sapit Premier Sarawak, Datuk Amar Awang Tengah Ali Hasan madah, raban nya ngesan pangku pengawa besai bekunsi penemu enggau meri pengeleda ngagai komuniti pemesai guna pelajar, pemansang diri enggau ngangkatka tikas idup.

“Kena manah peluang ti bisi nambah kaul kita enggau gawa ke pemansang orang kitai di Lawas enggau Limbang.

“Sebarang penemu enggau penau dikembuan kita, kena marit komuniti kitai ngeleda ke pemesai guna pelajar enggau pengawa ti manah,” ku iya.

Iya nyebut jaku nya ba Pengerami Ramah Tamah Aidilfitri Serakup Peranak Asal Lawas (JATI) di Dewan Seri Mahligai, ditu, Hari Empat.

Ku iya, mayuh anak Lawas diatu mujur ba mayuh pengawa nyengkaum servis perintah, pelajar, pengerai enggau lumba, lalu nya nyata ngayanka peranak ari menua nya ulih nyapai pemujur enti ransing ati.

Iya mega madah, serakup baka JATI besai pangku pengawa nyadi pelasar ngempung komuniti Lawas di Kuching kelimpah mantu sida ti datai ke mengeri ti deka berubat tauka nampung pelajar.

Iya meransang serakup nya ngerembaika kerejasama strategik enggau mayuh raban nyengkaum institusyen pelajar tinggi enggau agensi bekaul ungkup ngatur program baka seminar, woksyop enggau bekunsi peneleba ti ulih meri pemaik ngagai rayat di Lawas.

Datuk Amar Awang Tengah nyemetak madah, pengawa nya beguna endar nentuka rayat terus diembing nuju pengidup menyana agi kelimpah ulih nempa mayuh agi raban profesional baka injinia, akauntan, lutur enggau pakar ba mayuh pengawa.

Sama datai, Sapit Menteri ba Opis Premier Sarawak (Penyeraris Projek Ungkup Agensi Kandang Menua, DBKU enggau Pekara Islam) Datuk Dr Abdul Rahman Junaidi, Kaban Parlimen Lawas, Dato Henry Sum Agong sereta bala bukai.-EDISI UKAS