BETONG: Meri nama Jalai Lubok Tamang ti dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, ngeratan jerita baru pemansang infrastruktur menua pesisir lalu ngerumban akses enggau ngeranchak ekonomi menua nya.

Pengawa bejadi meri nama jalai nya diatur ba simpang jalai nya, ditu, Hari Lima.

Dulu ari nya, iya enggau bala pemesai bukai mending penerang projek ari Direktor Opis Kereja Raya (JKR) Sarawak, Datu Dr Cassidy Morris sebedau ngadu simbolik bejadi pal nama Jalai Lubok Tamang.

Jalai sepanjai 9.5 kilometer (km) nya nyambung Kampung Suri ke Kampung Manggut enggau Kampung Tuie, Debak, lalu nya meri pemaik ngagai urung 3,000 peranak dia.

Projek beungkus RM35 juta tembu menyana April 2023 nya mungkur pengawa ngaga jalai belakin enggau dua jematan meraka Sungai Jerai enggau Sungai Lubok Selubang.

Ari projek jalai nya, jam pejalai diatu nyau pandak agi kelimpah nambah jalai penyambung menua pesisir sereta ngerandang peluang ekonomi baru ngagai peranak menua.

Jalai nya mega disadang ditengah ke Agropark Lubok Tamang ti ulih ngubah rampa ekonomi Saribas nengah pemansang betanam betupi moden.

Ngenang pekara sama, Premier Sarawak mega diberi penerang pasal Projek Pemansang Lubok Tamang Agropark ari Menijar Besai Kaunsil Pemansang enggau Pengintu Tanah (LCDA), Datu Sr Zaidi Mahdi.

Projek gempuru pemesai 763 hektar nya mungkur pemansang endur betanam betupi, palan dagang temuai, palan nginjin enggau ngumpul asil sereta zon pemansang dudi hari enggau inyak pandan mayuh ditanam dia.

Agropark nya dikeandal ulih ngasilka nyentuk 10 juta ihi inyak setaun, lalu nyungkak pengulih eksport sereta enda kelalu bepanggai ba import komoditi nya.

Kelimpah ari nya, pengawa nya mega negapka ekosistem agropreneur lokal nengah pengawa puang, latih enggau regas mekuh chara betanam betupi moden.

Projek di baruh inisiatif Projek Rayat nya ditaga belabuh Jun 2026 enggau pengawa nanam dipejalai berenggat kandang 20 bulan.

Sama datai, Sapit Premier Sarawak Datuk Amar Douglas Uggah Embas, Sapitn Menteri Nembiak, Lumba enggau Pemansang Orang Dagang Sarawak ke mega Kaban Kunsil Nengeri (ADUN) Layar Datuk Gerald Rentap Jabu, Sapit Menteri ba Opis Premier Sarawak (Penyelaras Projek ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Sapit Menteri Pemansang Indu, Nembiak Mit enggau Pengelantang Komuniti Sarawak ke mega ADUN Saribas Datuk Mohammad Razi Sitam sereta Kaban Parlimen Betong Dato Dr Richard Rapu. –EDISI UKAS

Pemberita: Ahmad Daniel Faiz
Gambar: Ameerul Syafiq Khir