LAWAS: Perintah Sarawak merambu deka ngemansangka baru Pasar Trusan enggau chara berenggat nengah Program Mengeri Baru dikena ngaga siti pasar ke moden sereta berurun agi.

Sapit Premier Sarawak Datuk Amar Awang Tengah Ali Hasan madah, pengawa ngaga projek Northern Coastal Highway (NCH) nya deka mai empas ngagai beberapa bengkah kedai mit ba endur nya lalu sida ke bedagang dia deka dibai mindah ngagai palan baru ngambika sida mengkang ulih bejual.

Ku iya, Opis Kaunsil Pelilih Lawas deka ngemanahka agi tikas perengkaguna nyengkaum jalai tama ngagai palan nya.

"Kedai mit tu deka dibai mindah ngagai palan baru (sementara) ngambika sida mengkang ulih bejual taja projek benung digaga," ku iya nerang.

Iya madah munyi nya maya ngabas palan nya ba Pasar Trusan, Hari Minggu tu tadi.

Iya mega madah, perintah udah meri pemendar ngaga baru Pasar Trusan ti bela mungkur macham komponen dikena nyungkakka agi tikas ekonomi menua nya.

Tu nyengkaum ngaga opis pelilih mit, kedai, tamu ujung minggu, stesyen minyak sereta perengkaguna ke bukai.

Kelimpah ari nya, Datuk Amar Awang Tengah madah, menua ba seberai Pasar Trusan mega deka dikemansangka baka genturung pendiau, perengkaguna lumba sereta nyangka bela digagaka kuarters perintah. -EDISI UKAS