SARATOK: Penumbuh New Growth Centre (NGC) ba Pelilih Mit Nanga Budu disadang deka nyaup pemansang ekonomi enggau pemansang baru ba menua pesisir nya.

Kaban Kunsil Nengeri (ADUN) Krian Friday Belik madah, projek pemansang nya sebagi ari pengeransing perintah ngemansangka menua nya.

"Projek tu sebagi ari pengeransing kitai ngangkatka Nanga Budu nyadi sub-pelilih Saratok baka pelilih mit ke bukai iya nya Debak enggau Spaoh," pia ku iya.

Iya nerangka pekara nya maya Pengawa Nyua Chek Pampas Tanah ungkup Projek New Growth Centre ditu, Hari Dua.

Kelimpah ari nya, iya madah, perintah udah ngungkupka belanja RM2.5 juta dikena ngaga Balai Mensia Mayuh Nanga Budu.

Ukai semina nya ku iya, pengawa ngaga Opis Pelilih Mit Nanga Budu enggau kuarters perintah bela deka nyaup pengelantang orang kereja perintah ke gawa di menua nya.

Ba pengawa sehari nya, bisi 28 iku nerima chek pampas enggau semua penyampau manggai RM2.13 juta. -EDISI UKAS