Hak Bansa Dayak Seruran Dijaga, Ngasai Pemansang Deras
SERIAN: Hak raban bansa Dayak di Sarawak deka seruran dijaga enggau ditegi ungkup pengelantang rebak diatu enggau dudi hari.
Sapit Premier Sarawak, Datuk Amar Douglas Uggah Embas madah, pengeran nya dibantai nengah bemacham projek pemansang dipejalai ke meri pemaik terus ngagai rayat, lebih agi ba menua pesisir.
Ku iya, menua Serian udah ngasai pemansang deras kenyau ari sepuluh taun ke udah lalu asil mayuh projek dipejalai ari baruh Agensi Penyeraris Pemansang Greater Kuching (GKCDA).
“Sepenyampau RM1.5 bilion udah diagih nengah GKCDA dikena bejalaika mayuh projek pemansang ba menua tu.
“Kelimpah ari nya, sitak Kunsil Nengeri (DUN) Bukit Semuja mega nerima agih belanja RM125 juta dikena bejalaika projek pemansang ke meri pemaik ngagai peranak dia,” ku iya.
Iya nibar ke jaku nya ba mua mayuh rambau Pengerami Ngintu Gawai Dayak 2026 Bukit Semuja di Balai Babuk Salog, Kampung Riih Daso, kena Hari Satu.
Ba sukut pemansang rama enggau pengarap, iya madah ke Unit Pekara Pengarap Bukai (UNIFOR) udah ngagihka RM450 juta ngagai rumah sembiang mayuh pengarap ba selampur Sarawak kenyau ari ditumbuh.
Ari penyampau nya, RM11.3 juta udah diagih kena melanja projek bekaul rumah sembiang enggau perengkaguna pengarap di menua Bukit Semuja.
Sama datai, Menteri Pelajar, Inovasyen enggau Pemans Penau Sarawak, Dato Sri Roland Sagah Wee Inn, Menteri Industri Pemakai, Komoditi enggau Pemansang Kandang Menua Sarawak, Dato Sri Stephen Rundi Utom, Menteri Kereja Raya Malaysia, Dato Sri Alexander Nanta Linggi, Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben, Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan, Kaban Kunsil Nengeri (ADUN) Bukit Semuja, John Ilus, ADUN Serembu, Dato Miro Simuh sereta Datuk Amar Michael Manyin Jawong.-EDISI UKAS
