KUCHING: Pengeransing Perintah Sarawak ngenegapka atur gawa moden enggau mekuh pemanah pengawa ba sektor perintah majak mandangka asil lebuh Unit Transformasyen enggau Inovasyen Sarawak (STIU), Opis Premier Sarawak nerima dua aku ari Malaysia Book Of Records (MBR).

Pengawa ngaku nya ngaul kategori “First Public Service Agency to Implement A Sustainable Transformation and Innovation Framework” nengah pemansang langkar pemeruan SCS-NEXT sereta “The First Integrated Public Sector Excellence Certification Ecosystem By A State Government in Malaysia” ke ngaku pemansang ekosistem setipikit begulai sektor perintah nengeri.

Pengawa nyua setipikit nya meda Direktor STIU, Superi Awang Said nerima anugerah ari pengari MBR lalu disua ngagai Sapit Sekretari Perintah Sarawak (Operasyen), Datu Hii Chang Kee di Wisma Bapa Malaysia, kena Hari Dua.

Datu Hii madah, pemujur nya ukai semina dipeda ari lambang diaku aja, tang patut dibantai nengah pengawa ke manah ba servis perintah.

“Anang kitai semina deka ke anugerah aja tang udah tu nyau enda ingat sereta pulai baru ngagai chara lama ke dikena ngelama tu,” ku iya.

Iya mega nerang, pemansang langkar meruan nengah SCS-NEXT nya pengawa strategik dikena nentuka tetiap inisiatif transformasyen enggau inovasyen dipejalai meruan sereta konsisten.

“Tu magi pengawa negapka langkar kereja meruan ngagai semua projek inovasyen enggau transformasyen ba menua Sarawak,” terang iya.

Ngenang silik, iya madah ke Perintah Sarawak meri perati besai ngagai pekara pemeruan mungkur mayuh sektor nyengkaum kuasa enggau pengeraja asal seriris enggau agenda transformasyen servis perintah nengeri.

Berebak enggau nya, aku kedua nengah pemansang ekosistem setipikit begulai dipeda nyadi chara strategik ngenegapka sistem serenih pengawa bepuguka pekara nyata kelimpah pengandal rayat ngagai penau servis perintah.

Kededua inisiatif nya disadang meri empas signifikan ngagai inisiatif ngurangka pemayuh leman pengawa sereta nambah penyikar ngenataika servis perintah ke responsif enggau belalauka asil.

Kelimpah ari nya, pemujur nya mega dipeda dikena ngaku semua Servis Perintah Sarawak.-EDISI UKAS