Penerima Dua Kali Tuchuk Vaksin COVID-19 Ulih Bejalai Ke bukai

HARI LIMA, 2 APRIL 2021

KUCHING: Sida ke udah dua kali betuchuk vaksin COVID-19 lalu bisi setipikit tau bejalai ngagai nengeri bukai, sitak tauka pelilih dalam menua.

Menteri Besai Tan Sri Muhyiddin Yassin madah, nitihka pansik ke pemadu baru, sida udah nerima dua kali tuchuk vaksin nya likun ari ke dirampit pandemik COVID-19.

“Aku udah berandau enggau Kaunsil Pengelikun Menua (MKN) bekaul enggau vaksin COVID-19 tu.

“Kitai deka ngaga pemutus ngagai sapa ke udah nerima dua kali tuchuk vaksin, sida ulih bejalai ngelawa nengeri bukai, pelilih tauka sitak,” pia ku iya madah.

Iya bejaku munyi nya maya nimbal tanya siku penyereta, Sally Shahriza Ahmad ba ‘Townhall Wawasan Kemakmuran Bersama 2030’ ke diatur di BCCK, Kuching kena hari Empat.

Iya mega madah, pekara nya tau dirandau ba renggat entarabansa enggau beberapa buah menua ke bukai ngambika peranak Malaysia ulih bejalai ngagai menua bukai.

Sama bela datai maya tu iya nya Kepala Menteri Sarawak Datuk Patinggi Dr Abang Abdul Rahman Zohari Tun Datuk Abang Openg, Menteri Kereja Raya Dato’ Seri Fadillah Yusof, Menteri Pelajar Senator Datuk Dr Mohd Radzi Md Jidin, Speaker Kunsil Nengeri Sarawak Datuk Amar Mohamad Asfia Awang Nasar, Tuai Sekretari Menua Tan Sri Mohd Zuki Ali enggau Sekretari Perintah Nengeri Sarawak Datuk Amar Jaul Samion. -EDISI UKAS

Share

add comment