PM Makai Mi Kolok Haji Salleh

HARI LIMA, 2 APRIL 2021

KUCHING: Menteri Besai, Tan Sri Muhyiddin Yassin enggau bini iya Puan Sri Noorainie Abdul Rahman enda muai awak datai di Kuching makai mi kolok Haji Salleh ba Sepinang Sari Café, pagi tadi.

Menteri Besai datai dia urung pukul 7.30 pagi begulai ngirup pagi enggau Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg.

Sama bela datai nyempulang iya maya tu iya nya Sapit Kepala Menteri Sarawak, Datuk Amar Awang Tengah Ali Hasan, Menteri Kanan Kereja Raya, Dato Sri Fadillah Yusof, Menteri Muda Utiliti (Bekal Ai), Datuk Dr Abdul Rahman Junaidi, Sapit Sekretari Perintah Sarawak, Dato Sri Mohamad Abu Bakar Marzuki sereta sida ke bukai.

Berebak enggau nya, Haji Salleh Reduan ti bempu Sepinang Sari Café berasai gaga enggau penatai Menteri Besai ngelawa kedai makai iya.

“Aku berasai temegah ati laban Menteri Besai udah datai ngagai nengeri kitai lalu ngetu makai ba kedai makai tu,” ku iya madah.

Dulu agi ari tu, Mi Kolok Haji Salleh kala disebut Menteri Besai maya mantaika jaku khas iya dikena nyadika chunto ba Pakej Prihatin PKS kena April 2020. –EDISI UKAS