Sarawak Chukup Manah, Nyelai: Tan Sri Muhyiddin Yassin

HARI LIMA, 2 APRIL 2021

KUCHING: Sarawak chukup manah sereta ngembuan penyelai ba ati Menteri Besai, Tan Sri Muhyiddin Yassin.

Maya Pengerami Begulai Enggau Pemesai Raban Bansa ba Palan Pematih Pengajar Kampus Tun Abdul Razak, Kota Samarahan, kena hari Lima, iya madahka Sarawak nengeri ti chukup manah sereta ngembuan penyelai ba iya.

Ku iya, iya semampai tekait ati enggau pemanah bala pemesai sereta rayat nengeri Sarawak.

Penatai iya nemuai ke Sarawak serak tu ba iya baka ke pulai ngagai menua asal diri empu.

“Kenyau ke datai di Sarawak kemari nyentuk ke sehari tu, aku ngasai bisi penyelai maya ngulu beberapa bengkah program ke udah ditusun, betemu enggau rayat.

“Nya alai, endang amat aku kala nyebut ba sebengkah pengerami madahka maya nemuai ke Sarawak baka ke pulai ke menua diri. Tu pemanah enggau penyelai Sarawak,” pia ku iya madah.

Sama bela datai maya pengerami tu iya nya Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg, Sapit Kepala Menteri Sarawak, Datuk Amar Awang Tengah Ali Hasan enggau temuai ke dipebasa ke bukai.

Kelimpah ari nya, Menteri Besai mega madahka iya berasai lantang ati enggau sukung ke diberi Perintah Sarawak ari pegai Gabungan Parti Sarawak (GPS) ti betuaika Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg.

Iya madah, sukung GPS nya endang dipebasaka iya dikena neruska pengawa megai menua tu.

“Aku berasai lantang ati lebih agi iya (Datuk Patinggi Abang Zohari) madahka GPS nengah pegai iya deka semampai meri sukung ngagai aku nyadi tuai ba renggat perintah besai, terima kasih, aku endang bebasaka sukung tu,” ku iya madah baru.

Maya tu mega, Tan Sri Muhyiddin enda nyalam madahka diri berasai lantang enggau sampi siku ex-penghulu maya iya datai ngabas ex-penghulu nya di Kampung Sindang, Kota Samarahan. -EDISI UKAS

Share

add comment