HARI DUA, 6 APRIL 2021
KUCHING: Perintah Sarawak deka chakah agi ngemujurka Skim Nangkir Genturung Pendiau (SPK) dikena nyungkakka tikas pengidup rayat.
Kepala Menteri Sarawak, Datuk Patinggi (Dr) Abang Abdul Rahman Zohari Tun Datuk Abang Openg madah, perintah nengeri deka nyendiaka taba tanah nyengkaum infrastruktur ke bukai ba genturung pendiau ti deka digagaka projek nya.
Iya madah, perintah Sarawak deka mayar semua ungkus pemansang infrastruktur nya.
“Kitai deka nyendiaka taba tanah enggau infrastruktur baka jalai alun, parit semin, bekal karan enggau ai ba genturung pendiau ti deka digagaka projek nya ti tau bendar nyungkakka tikas pengidup rayat.
“Tu ulih dipejalaika kitai laban aku pechaya bisi penguntung enti kitai bekunsika pemisi enggau rayat,” ku iya madah maya ba Pengerami Begulai Enggau Pegawai Tanah Enggau Survei Sarawak di Kuching kena hari Satu.
Nambahka jaku iya, iya madah, skim tu mega deka digaga nyengkaum di rumah panjai.
Kelimpah ari nya, Datuk Patinggi Abang Zohari muji pengeransing Opis Tanah Enggau Survei (JTS) ti udah mujur myukat 40,111 hektar tanah NCR ungkup sukat kelinggi tanah NCR kelimpah 12,322 hektar agi ungkup tanah tubuh siku taun siti tadi taja betapi enggau pengelekai COVID-19.
Iya madah, inisiatif JTS numbuhka servis ngena online iya nya Land and Survey Information System (e-LASIS) mega engkeman bendar digaga maya tu.
“e-LASIS tu udah nyadi model enggau chunto ngagai selampur Malaysia.
“Tu pemujur patut dikemegahka kitai nyentuk sida di Semenanjung ngambi tu nyadika chunto iya ke bekenaka teknologi pemadu baru dikena nemu pekara ke silik agi bekaul enggau tanah,” ku iya madah. – EDISI UKAS
Comments