HARI EMPAT, 3 JUN 2021
KUCHING: Sarawak nerima vaksin COVID-19 bansa Pfizer-BioNTech dianjung nengah bilun di Kuching, kena Hari Tiga.
Pekara nya dipadahka Menteri Kaunsil Kandang Menua Enggau Pengawa Berumah, Dato’ Sri Dr Sim Kui Hian nengah status facebook iya, kena Hari Tiga.
Iya madah, vaksin nya dianjung ninting minggu ungkup rayat ba nengeri tu.
“Bisi agi vaksin COVID-19 bansa Pfizer dianjung ninting minggu datai di Kuching malam tu.
“Vaksin serak tu sebagi ari ungkup Program Vaksinasyen COVID-19 Menua (PICK),” ku iya.
Dato’ Sri Dr Sim ti mega penyanding penemu Komiti Penyangga Penusah Nengeri (JPBN) Sarawak madah, sida nganti vaksin ari perintah besai ba minggu siti ti deka datai.
“Kitai nganti vaksin ari Menteri Koordinator Program Imunisasyen COVID-19 Menua, Khairy Jamaluddin enggau Komiti Pengereja Pengawa Khas Imunisasyen COVID-19 (CITF) ba minggu siti ti deka datai.
“Opis Pengerai Malaysia (KKM) udah ngerintaika penyampau vaksin ngagai Opis Pengerai Nengeri Sarawak (JKNS),” ku iya madah. –EDISI UKAS
Comments