HARI DUA, 29 JUN 2021
KUCHING: Menteri Besai, Tan Sri Muhyiddin Yassin madahka siti agi pakej bantu iya nya Pakej Perlindungan Rakyat enggau Pemulihan Ekonomi (PEMULIH) ditumbuhka enggau agih belanja RM150 bilion.
Madah maya mantaika jaku khas di Kuala Lumpur kena Hari Satu, ku iya, tuju PEMULIH ditumbuh iya nya dikena meri bantu ngagai genap iku rayat maya betapi enggau pengelekai COVID-19.
Iya madah, tiga batang pekara deka dikemeratka ba pakej tu iya nya nandu tuju betatika rayat, nyukung pengawa dagang sereta nyungkakka vaksinasyen.
“Aku deka madahka nyentuk ngagai ujung taun tu, perintah deka meri bantu RM10 bilion ngagai rayat seriris enggau juluk ati perintah deka nandu tuju betatika rayat.
“Bantu tu nyengkaum Bantuan Prihatin Rakyat (BPR), Bantu Khas COVID-19 (BKC) enggau Bantu Lenyau Kereja,” ku iya madah.
Kelimpah ari nya, ku iya, perintah deka nambahka elawin ba ngiga pengawa ngagai sida ke nadai PERKESO lebih agi baka baru abis graduate, baru tembu besekula enggau tauka sida ke ukai gawa ba sektor ‘formal’ alai sida ulih ngerejister nengah MYFutureJobs lalu deka nerima elawin abis nadai RM300.
“Perintah deka ngagihka belanja RM125 juta nengah HRD Corp dikena ngatur ‘Place and Train’ ba program Janapreneur lebih agi ngagai nembiak ke baru abis sekula.
“Inisiatif tu dipelabaka deka meri awak ngagai 30,000 iku orang ba program pematih nya lalu ditentuka bisi pengawa sepengudah abis program,” pia ku iya. –EDISI UKAS
Comments