HARI EMPAT, 2 SEPTEMBER 2021
SIBU: Kaban Kunsil Nengeri (ADUN) Daro, Safiee Ahmad mujur bejadika program nyuaka chek Projek Mit Menua Pesisir (MRP) di Opis Pelilih Sibu, kena Hari Tiga.
Penerima chek MRP RM94,000 tu iya nya Komiti Pemansang Enggau Pengelikun Genturung Pendiau (JKKK) Lengan enggau Batang Lassa sereta Gerempung Apai Indai Enggau Pengajar (PIBG) Sekolah Menengah Kebangsaan (SMK) Bawang Assan.
Ba program ke sebaka, Safiee mega nyuaka Setipikit Nampung Timpuh Gawa Tuai Rumah ngagai Tuai Rumah Francis Pengarah, Tuai Rumah Jimbau Damu enggau Tuai Rumah Jinga Kedit, enggau Setipikit Nyiri Tuai Rumah ngagai Stephen Bungkok.
Bejaku ba pekara bekaul enggau Atur Operasyen Standard (SOP), iya ngarapka raban JKKK bela nyaup Perintah Nengeri ngemunaska pengelekai COVID-19.
“Tu maya iya semua JKKK besaup nentuka pengelikun ba genturung pendiau diri,” ku iya. –EDISI UKAS
Comments