CENTEXS Mukah Ngerandang Awak Belajar Teknikal Bala Nembiak Mukah

HARI EMPAT, 2 SEPTEMBER 2021

MUKAH: Penumbuh Centre Of Technical Excellence Sarawak (CENTEXS) di Mukah ngemunka sitak nya nyadi siti agi palan pelajar di Sarawak.

Kaban Kunsil Nengeri (ADUN) Tellian, Yussibnosh Balo madah, CENTEXS Mukah ti udah dipenyadika Kepala Menteri Datuk Patinggi (Dr) Abang Abdul Rahman Zohari Tun Datuk Abang Openg kena hari Enam tu tadi, ulih alai 800 iku nembiak belajar sekali kelimpah nyediaka kus teknikal ba Minyak enggau Gis enggau Akademi Kelapa Sawit enggau Kebun Bedandang Besai.

Bepun ari nya, maya dirandau UKAS nangkan pengerami bejadi nya, iya ngarapka bala nembiak di Mukah anang enggai beambi ulih belajar ba palan nya.

“Aku ngarapka peranak Mukah lebih agi raban nembiak anang enggai ngambi awak belajar ba CENTEXS Mukah tu.

“Pia mega, aku ngarika rayat ditu meri jaku terima kasih ngagai Perintah Sarawak ke udah numbuhka siti agi palan pelajar di Mukah ditu,” pia ku iya madah.

Kelimpah ari iya, ADUN Balingian, Abdul Yakub Arbi mega madahka penumbuh CENTEXS Mukah deka nyadika jalai muntang ngagai bala nembiak nampung pelajar ba kus pengelandik.

Iya bela meri jaku terima kasih ngagai perintah Gabungan Parti Sarawak (GPS) ke udah numbuhka CENTEXS di Mukah.

Ba EXCO Raban Nembiak PBB Sarawak, Royston Valentine, CENTEXS nya ukai semina mai penguntung ngagai bala nembiak tang mega seririh enggau nama bagi guna ke patut di Mukah.

“Palan belajar tu mai penguntung ngagai rayat Mukah bepun ari CENTEXS bisi nyediaka pelajar bekaul enggau industri minyak enggau gis kelimpah industri kelapa sawit enggau kebun bedandang besai.

“Ngarapka baka nembiak di Mukah anang enggai nyambung pelajar sida baka kus tu,” ku iya madah.

CENTEXS Kampus Mukah digaga ba 13 ekar pemesai tanah lalu ulih alai 890 iku belajar sekali sereta digaga enggau ungkus RM50 juta. -EDISI UKAS

Share
0

add comment