289,200 Iku Nembiak 12-17 Taun Di Sarawak Betuchuk Vaksin Berengkah Sehari Tu

HARI TIGA, 8 SEPTEMBER 2021

KUCHING: Sepenyampau 289,200 iku nembiak ke beumur 12 ngagai 17 taun di Sarawak deka betuchuk vaksin enggau chara berenggat berengkah sehari tu tadi (Hari Tiga).

Direktor Opis Pengerai Nengeri Sarawak, Dato Dr Mohamed Sapian Mohamed, nitihka penerang ari Jabatan Perangkaan Malaysia ba taun 2021, penyampau nembiak ke beumur 16 ngagai 17 taun di Sarawak iya nya bisi 96,400 iku tauka 3.4 peratus ari penyampau tubuh rayat di nengeri tu.

Lalu nembiak ke beumur 12 nyentuk 15 taun bisi 192,800 iku tauka 6.9 peratus.

“Ba renggat keterubah, program nya deka diungkupka ngagai nembiak ke beumur 12 ngagai 15 taun ke bisi ‘komorbid’ enggau nembiak ke beumur 16 nyentuk 17 taun.

“Nembiak ke beumur 12 ngagai 15 taun ke nadai penyakit bukai dilanggur deka betuchuk vaksin ujung bulan tu, nitihka penyampau vaksin ke dianjung ngagai Sarawak,” pia ku iya madah nengah penerang media, kena Hari Tiga.

Dato Dr Mohamed mega madah, program nya deka diatur ba Palan Meri Vaksin (PPV), sekula enggau klinik pengerai.

Batang tuju program imunisasyen ungkup nembiak di sarawak deka nentuka nembiak beumur 16 ngagai 17 taun bela betuchuk vaksin sebedau sekula dibuka kena 3 Oktober 2021. -EDISI UKAS

Share
0

add comment