HARI SATU, 10 JANUARI 2022
KUCHING: Parti Pesaka Bumiputra Bersatu (PBB) deka numbuhka siti pati baru ke diungkup ngagai raban nembiak beumur 18 ngagai 28 taun.
Kepala Menteri ke mega Presiden PBB, Datuk Patinggi Tan Sri (Dr.) Abang Abdul Rahman Zohari Tun Datuk Abang Openg madah, ketegal nya sida deka ngadu baru atur ba parti nya.
“Kitai ngaga pati khas ungkup raban nembiak laban kitai meda sida ngelama tu semampai begulai enggau kitai ngaduka pengawa bekaul enggau rayat ukai semina ngagai raban nembiak aja tang mega semua renggat umur.
“Kitai mega ngira penyampau raban ke tuai majak nambah lalu kitai mesti mendingka penemu raban nembiak alai kitai nemu jeman digital diatu, penemu sida deka berubah nyerumba ubah ba peminta rayat maya hari tu,” pia ku iya ba aum media udah betuaika Aum Kaunsil Besai PBB Sarawak Renggat Ke-13 ba Palan Konvensyen Borneo Kuching (BCCK), kena Hari Minggu.
Nambahka jaku iya, Kepala Menteri madah, PBB deka nyadi parti ke dinamik khas ungkup raban nembiak enggau rayat Sarawak bepelasarka gaya politik enggau ekonomi Sarawak maya hari.
Ba aum media nya, Kepala Menteri mega madah, PBB Sarawak deka ngemeranka pengawa Sarawak chakah ba pekara bekaul enggau kuasa sereta ekonomi baru ti bekenaka Grit Teknologi bepelasarka pengelikun rampa menua.
“Perintah Sarawak nengah Opis Menteri Pengerai Mensia Mayuh deka megai tanggungpengawa bekaul enggau pengerai lalu semampai ngelaluka pengawa ngaduka pansik pengerai nengah palan pemansik ke udah ditumbuhka kitai,” ku iya madah baru.
Ku iya, Sarawak ti suah betapi enggau gaya hari berubah, pengawa nya bisi kaul enggau pekara nyaga rampa menua ke patut dikemeranka ba pegai perintah dalam kandang lima taun deka datai.
“Kitai deka nyungkakka pengawa nanam baru kampung sereta mansik pengawa ngatur kampung ketegal ngira dudi hari,” pia ku iya nerang. -EDISI UKAS