HARI DUA, 25 JANUARI 2022
BETONG: Penumbuh Komiti Pemansang Pelajar Layar (LEDC) mujur mai ubah sereta nyaup nyungkakka tikas pelajar ba sitak Kunsil Nengeri (DUN) Layar.
Menteri Muda Pemansang Raban Nembiak enggau Lumba, Dato Gerald Rentap Jabu madah, iya andal pengawa ke diatur komiti nya ulih nyaup Opis Pelajar Pelilih Betong nyendiaka perengka guna tauka kereban belajar ngagai bala nembiak.
“Kelimpah ari nya komiti bela mantu meri latih tambah ari sida ke landik ba pelajar tumu nembiak mit ti bekenaka Jaku Inggeris ngagai bala pengajar,” pia ku iya madah ba pengerami masa pengajar program Jolly Phonics ba Palan Servis DUN Layar, kena Hari Minggu.
Nambahka jaku iya, Datuk Gerald madah, Opis Menteri Pelajar Malaysia (KPM) endang bisi meri macham bengkah chara ngajar enggau belajar tang dikena nambahka pemayuh nembiak lengkas macha sereta bejaku ngena Jaku Inggeris, chara ngajar ngena Program Jolly Phonics dipeda engkeman.
Ba pengerami nya, iya ke mega Kaban Kunsil Nengeri (ADUN) Layar bisi nyuaka pemeri kereban malin pelajar ngagai nembiak Primari 4, 5 enggau 6.
Kelimpah ari nya, kereban malin pelajar enggau lap top bela diberi ngagai nembiak Pom 5 enggau 6.
Naka ke diatu, semina DUN Layar aja bisi komiti nya dikena nyaup bala nembiak belajarka Jaku Inggeris kelimpah bela nerima sukung ari Opis Pelajar Nengeri. -EDISI UKAS