HARI DUA, 1 MARCH 2022
SIBU: Kepala Menteri, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyemetak madahka perintah Sarawak bebendar nentuka atur tender tebuka nitihka prosedur ti dikemendar.
Pia mega ku iya, ulah ke enda engkeman enda patut nyadi lalu semua ejensi mesti negapka atur pengawa sida ba pekara nya.
“Pengawa tu mesti dipejalai enggau ulah angkun sereta integriti dikena nyeliahka belanja ke enda patut ti tau nambahka ungkus kereja tauka produk.
“Pekara nya tau mai pengerugi ngagai rayat sentang ‘wang rayat’ enggau pemansang ungkup rayat,” ku iya ba teks jaku iya ke dibacha Sapit Kepala Menteri, Datuk Amar Douglas Uggah Embas beserimbai enggau Majlis Amanat Perdana Integriti 2022 di Sibu, kena Hari Satu.
Ku iya nambah, proses tender mega mesti dipansik baru dikena nentuka projek digaga nitihka timpuh, langgur enggau belanja ke udah ditetap.
“Kitai patut nemu orang ke meri rega tender murah ukai chara ke engkeman dikena ngemujurka pejalai projek enggau mujur.
“Tu tau ngujungka projek laun tembu serta penanggul ke bukai nyema diberi ngagai orang ke meri rega tender murah,” ku iya madah.
Nya alai, Kepala Menteri ngemeranka pengatur pengawa mansik dulu ngambika bulih tender ke manah.
Ku iya madah baru, projek ke enda mujur tau nyadi pengerugi besai ngagai rayat ketegal sida arapka perintah ngaga projek nya.
“Pekara tu endang semampai ditandu laban endang dikemeratka lalu minta semua ejensi nitihka atur ngambika projek mujur digaga,” ku iya.
Pia mega iya madahka agi bisi kes sida ke ditemu ngaga penyalah lalu minta semua ejensi ngenegapka atur pengawa sereta enda bechiping.
Kelimpah ari nya, Kepala Menteri bela deka minta pekara bekaul enggau isu audit dikemeratka semua opis Menteri enggau ejensi.
Iya madahka ejensi mesti nyediaka akaun sida lalu diaudit dalam timpuh ke udah diberi.
“Patut nadai leman meri akaun ba pengawa audit, semua ejensi mesti nitihka atur tu alai nya mandangka kami bebendar ngatur sentang pekara bekaul enggau wang,” ku iya nyemetak madah.
Kelimpah ari nya, Kepala Menteri udah meri tanggung pengawa ngagai Unit Integriti enggau Ombudsman (Union) nengeri nentuka ejensi ke mujur diberi anugerah khas — Anugerah Amalan Terbaik Perakaunan (ABPA).
Iya nambah, sebana ari rayat mega mesti dikemerat lalu diputarka ejensi ke udah ditetap. -EDISI UKAS