HARI ENAM, 12 MAC 2022
KUCHING: Palan Pelajar Tinggi (IPT) baka Sarawak Skills enggau Kolej Universiti iCATS megai tanggungpengawa berat dikena nempa pengereja pengawa landik ba bemacham teknologi baru.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak begunaka pengereja pengawa landik ba industri ngena gas hidrogen enggau teknologi digital ke nyadi penyungkak ekonomi kemaya hari tu.
Ku iya, pengawa ngiga pengereja pengawa landik nya endang digiga diatu, laban Sarawak udah ngemansangka projek ngena kuasa sel gas hidrogen lebih agi ungkup guna bas enggau entukar.
Iya madah munyi nya nengah teks jaku iya ke dibacha Menteri Pelajar, Inovasyen enggau Pemansang Pengelandik, Datuk Roland Sagah Wee Inn ba Program Konvokesyen Sarawak Skills enggau Kolej Universiti i-CATS Ke-24 bepalan ba Borneo Convention Centre Kuching (BCCK) kena Hari Enam.
“Palan Pelajar baka Sarawak Skills enggau Kolej Universiti iCATS megai tanggungpengawa ke berat ngiga orang ke landik gawa bekenaka mayuh macham bengkah teknologi baru nyengkaum pemansang ngena gas hidrogen enggau teknologi digital. Aku chukup temegah ati laban diatu iCATS udah diangkat nyadi palan kolej universiti lalu dikarap mayuh agi program degree, degree falsafah tauka program graduate falsafah ba nengeri tu deka disediaka jemah,” ku iya madah.
Berebak enggau nya, Datuk Patinggi Tan Sri Abang Zohari Madah, Perintah Sarawak udah netapka polisi negapka ekonomi gadung iya nya pelin pemansang bepelasarka kuasa ke ulih dikena baru, dikena nyungkak penatai pemisi enggau ngemansangka nengeri tu.
“Perintah nengeri udah netapka polisi dikena ngenegapka ekonomi gadung iya nya strategi pemansang bepelasarka kuasa ke ulih dikena baru. Sarawak chukup betuah laban menua kitai tu ngeluarka kuasa ulih dikena baru, ngambika chunto, asil kuasa ari tekat hidro ulih nyungkakka pemansang industri ba nengeri tu, kelimpah kitai mega ngembuan kuasa hidro ti pemadu besai di Malaysia,” pia ku iya madah.
Ba pengawa nya bisi 697 graduet ari bemacham program akademik sereta pengelandik bela nerima skrol diri nyengkaum 300 iku penerima Setipikit Pengelandik Malaysia (SKM), 103 iku penerima Diploma Pengelandik Malaysia (DKM) enggau 11 iku penerima Diploma Pengelandik Sambung Malaysia (DLKM).
Udah nya ungkup program akademik (i-CATS UC enggau i-CATS Miri), bisi 58 graduet ari Program Degree (Injinir Kereban enggau Pengatur Pengawa Dagang), 214 iku graduet ari bemacham program diploma, enggau 11 graduet ari Setipikit Program Injinir Elektrik enggau Elektronik.-EDISI UKAS