HARI MINGGU, 13 MAC 2022
KABONG: Kaban Kunsil Nengeri (ADUN) Kabong, Mohd Chee Kadir bisi madahka sekeda Projek Transformasyen Menua Pesisir (RTP) ADUN Kabong taun 2022 ungkup peranak di Roban.
Entara projek RTP iya nya ngemanah Dewan SJK Chung Hua Roban ke nerima agih sepenyampau RM250,000, ngemanah Jalai Pendam Komuniti China ba Kranggas sepenyampau RM150,000 enggau ngemanah Infrastruktur Waterfront Seblak Renggat 3 sepenyampau RM100,000.
Iya madah munyi nya maya ba Program Merarau Diatur Kaunsil Pengatur Sekula SJK (C) Chung Hua Roban ba Paramount Hotel Sibu, kena Hari Enam tu tadi.
Ba program maya nya mega bela bisi diatur pengawa meri tanda basa ngagai Ex-Kepala Pengajar SJK Chung Hua Roban, Poi Chee Keong.
Sama bisi datai Penghulu Lim Kheng Huat; Kapitan Ho Thung Kie; Kepala Pengajar SJK Chung Hua Kabong, Wong Ling Lung enggau Kepala Pengajar SJK Chung Hua Roban, Oi Ai Hien.-EDISI UKAS