HARI SATU, 14 MARCH 2022
MARUDI: Pengawa sida ke indu maya hari tu ukai semina ba ruang bilik aja tang bela nyaup nyungkakka penatai pemisi.
Sapit Menteri ba Opis Premier Sarawak (Orang Gawa, Imigresen enggau Matau Projek) Dato Gerawat Gala madah, diatu udah mayuh sida ke indu mujur ba pengawa dagang.
“Ketegal nya, kitai ngarapka bala indu bukai anang lembau ngiga penatai nyengkaum bekenaka media rama.
“Ambika chunto, kita tau nyual asil pengelandik jari nengah media rama ke udah ditemu mujur amat maya hari tu ukai semina dagang ba menua tu aja tang nyentuk ngagai menua bukai,” pia ku iya madah maya Bejadika Pengawa Nutup Peransang Penemu ke diatur Serakup Indu Dayak Sarawak (SIDS) Pampang Marudi di Dewan Suarah Marudi, kena Hari Enam.
Program dua hari berunggu nya digulu 48 iku penyereta.
Dato Gerawat ke mega Kaban Kunsil Nengeri (ADUN) Marudi madah, sida ke indu tau bepintaka bantu ari Perintah Sarawak ke udah mayuh numbuhka macham bengkah bantu.
Kelimpah ari iya, jaku peransang ke sebaka bala dikenataika Chairperson SIDS Pampang Marudi, Kaunsilor Yanti Nyanggau.
Ku iya, orang indu patut nyikap diri enggau penemu sereta pengeransing ngaduka nama-nama pengawa enggau mujur.
Ba pengerami nya, Dato Gerawat mega bisi nyuaka agih Projek Mit Menua Pesisir (MRP) RM15,000 ngagai SIDS Pampang Marudi. -EDISI UKAS