HARI SATU, 21 MARCH 2022
KUCHING: Makmal betanam betupi deka digaga di Gedong dikena nyaup nyungkakka sektor betanam betupi di nengeri tu lalu nempa Sarawak nyadi palan pemansut produk betanam betupi.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, makmal nya dipegai Universiti Malaysia Sarawak (UNIMAS) ke bisi fakulti baru iya nya Fakulti Alam Sekitar dan Pertanian.
“Siti makmal betanam betupi deka digaga kitai ba Gedong ti deka dipegai UNIMAS.
“Makmal tu deka bejalaika pengawa mansik ngena teknologi ti nyadi pemun ngagai pemansang betanam betupi kelimpah nyadika chara nyungkakka sektor tu lalu nempa Sarawak nyadi palan pemansut produk betanam betupi,” pia ku iya madah maya Majlis Amanat Perwakilan PBB Cawangan N.26 Gedong ditu, kena Hari Minggu tu tadi.
Maya nya bisi 400 iku Raban Komiti Perwakilan Pergerakan Bapa, Wanita dan Pemuda pampang N.26 Gedong datai ngulu Mesyuarat Perwakilan PBB N.26 Gedong ungkup timpuh 2022 -2025.
Kelimpah ari nya, Premier Sarawak mega madahka pemujur Gabungan Parti Sarawak (GPS) ke bulih 76 ari 82 penuduk maya Pengawa Bepilih Besai Nengeri Sarawak Ke-12 nyadi kelai pengandal rayat pegai perintah ti betuaika iya.
Sama bela datai maya pengawa sehari nya, Kaban Parlimen Batang Sadong ke mega Menteri Dagang Temuai, Seni enggau Main Asal Malaysia, Dato Sri Nancy Shukri enggau Kaban Kunsil Nengeri (ADUN) Simunjan, Awla Dris. -EDISI UKAS