HARI DUA, 22 MARCH 2022
MIRI: Opis Menteri Pemansang Infrastruktur Enggau Penyangkai Kapal (MIPD) deka beratika silik penanggul sungai ke pabu ngelawa Penyangkai Kapal Miri di Kuala Baram.
Iya ke mega menteri ba opis menteri nya madah, chara ke engkeman patut dikena mutarka penanggul ke udah lama nekul pengawa penyangkai kapal nya.
“Penanggul tu enda ulih diterima ba penyangkai kapal ke bisi ngembuan RM250 juta ari pemeranak puku alai kapal ke patut sangkai dia nyau besauh di Sungai Miri,” pia ku iya madah.
Iya bejaku munyi nya udah ke ninga penerang ari Menijar Besai Penyangkai Kapal Miri, Serawa Budol maya ke ngabas penyangkai kapal nya, kena Hari Minggu tu tadi.
Nambahka jaku iya, Datuk Amar Douglas Uggah madahka penanggul nya bela deka diputar enggau chara ngaul politik ti deka dibantai ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
“Enti penanggul tu ulih diputar kitai pechaya mayuh agi kapal ke besai datai sangkai ba penyangkai tu.
“Sida deka beranakka puku ditu, nyungkakka awak dagang kelimpah numbuhka mayuh kereja puang.
“Tu seririh enggau juluk ati Sarawak ke deka nyadi nengeri mansang manggai taun 2030,” ku iya madah baru.
Ba pekara bukai, iya minta sida ke ngatur operasyen penyangkai kapal ulih ngemeratka servis ke pemadu manah.
Ku iya, sida mesti bisi ulah deka besemekih, kreatif, inovatif sereta ngembuan teknologi pemadu baru ngambika mujur manding penyangkai kapal bukai baka di Labuan enggau Semenanjung Malaysia. -EDISI UKAS