HARI SATU, 28 MARCH 2022

LAWAS: Genturung pendiau di pelilih Lawas agi begunaka pemansang infrastruktur seririh enggau guna sereta ubah maya hari tu.

Sapit Menteri Perengka Pengangkut Malaysia, Dato’ Henry Sum Agong madah, ambika banding, Kampung Punang patut digagaka pemansang ti lebih agi.

“Ketegal nya, aku minta raban Opis Volunteer Malaysia (RELA) Zon Punang nyengkaum ejensi perintah ke bukai besaup madahka perintah semampai chakah mantu rayat ba genturung pendiau tu.

“Seraya ngaduka pemansang, perintah mega chakah nentuka pengerai rayat maya pandemik COVID-19 baka beberika vaksin, bantu belanja sereta mayuh agi,” pia ku iya madah maya Program Berupan Meresi Tebing Tasik Punang enggau Masjid Kampung Pundang di Kampung Punang, Lawas kena Hari Enam tu tadi.

Bekaul enggau program ke digulu 70 iku raban RELA nya, Dato’ Henry madahka pengawa RELA bela bekaul enggau mensia mayuh.

“Tu baka ke dipeda kitai sehari tu alai RELA enggau kitai besaup nyaga pemeresi kandang menua,” pia ku iya madah.

Ba program nya, iya ngungkupka agih belanja RM20,000 ngagai RELA Zon Punang enggau RM50,000 agi dikena ngaduka projek ba Balai Mensia Mayuh Kampung Punang. -EDISI UKAS

add comment