HARI SATU, 28 MARCH 2022
KUCHING: Opis Menteri Dagang Temuai, Industri Kreatif Enggau Seni Pemerindang Sarawak (MTCP) melabaka 1.2 juta iku temuai deka datai ke Sarawak udah pemutus muka pintu penama tauka entara menua berengkah dikemendarka.
Menteri Ba Opis Menteri Tu, Dato Sri Abdul Karim Rahman Hamzah madah, pekara nya deka berengkah dipejalaika pun bulan april tu udah Opis Menteri Pengerai Malaysia (KKM) enggau kaunsil Pengelikun Menua (MKN) ngaga pemutus.
Iya mega madah, pekara tu endang dianti dikena mulaika pemanah tikas industri dagang temuai menua.
Iya bejaku munyi nya maya dirandau media udah bejadika Pengerami Nutup Meow City Bundle Fest 01 di Mydin Samariang, kena Hari Minggu tu tadi.
Maya nya, iya ke mega Menteri Raban Nembiak, Lumba enggau Pemansang Orang Dagang Sarawak madahka iya nyukung amat raban nembiak ngatur program baka sehari nya.
Ku iya, Opis Menteri Raban Nembiak, Lumba enggau Pemansang Orang Dagang Sarawak chakah deka nyaup raban nembiak bela ngambi bagi ba pengawa dagang di nengeri tu. -EDISI UKAS