HARI DUA, 21 SEPTEMBER 2022

KUCHING: Menua India bisi pengingin deka nempa kaul rat enggau Sarawak ba macham bengkah pekara ke dipeda ulih dikemansangka.

Pesuruhjaya Tinggi India ke Malaysia, B Nagabhushana Reddy madah, sida ulih nyali pengelandik menua sida bekaul digital dikena nyaup Perintah Sarawak bejadika ubah ekonomi di nengeri tu.

Tu nyengkaum ba Pelin Pemansang Udah COVID-19 (PCDS) 2030 Sarawak ti dipeda iya siti chara ngaduka pemansang ke chukup engkeman.

“Aku meda tu sebagi ari pengeransing Sarawak ngubah ekonomi bepelasarka digital ti ngemeratka pemansang sektor orang gawa, minyak enggau gas sereta sektor rama,” ku iya madah ngagai media.

Iya madahka pekara nya udah ke ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Wisma Bapa Malaysia ditu, kena Hari Dua.

Nambahka jaku iya, Reddy madahka penatai temuai ari India ke Sarawak deka majak nambah dudi hari ila lebih agi udah Konvensyen Persekutuan Ejen Pelancongan India (TAFI) diatur ba Palan Konvensyen Borneo Kuching (BCCK) berengkah ari Hari Dua nyentuk Hari Lima tu. -EDISI UKAS

add comment